31/8 Host Parents強勢回歸

今日是第二個上課日呢。


今日直接行去車站廢時轉車。買票既時候，諗住用散紙試下好似琴日咁Ｏ唔ＯＫ，點知入多左錢，結果順利買票-_-...

上既係法國文化導引，教授幾生動有趣幽默，但佢個身係咁郁，搞到我睇得好攰。十點半約左International Office既人搞social security，好麻煩咁搞完之後佢先話，仲要去銀行買多個civil liability insurance先拎得學生證。。。sigh。

上到十二點，然後兩點九再有法文測試，作為法文分班之用，於是同來自荷蘭既Stephanie同Jenny食飯，佢地去左麥當勞，我就自己帶左今朝早整既芝士煙肉菜漢堡去食，D煙肉硬左冇咁難食！

食完飯，時間尚早，去左用電腦。用到兩點半就行去課室喇。等左好耐好耐，好似係三點九先終於開始，效率真係好慢好慢完全唔明點解啲座位會咁混亂，佢地既心機究竟放左喺邊度？四點九終於走得，即刻返屋企，見下我既Host parents，佢地終於終於去完旅行喇！！

行過樓下買左Postcards，唔算太貴，但都成五蚊港幣一張，希望郵費唔好太貴！

未開門已經聽到入面有人聲，好緊張呀！一入到去就見到傳說中既Myriam同佢個仔傾緊計！感覺上佢係一個幾Nice既法國中年女人，有少少似喺港大既一個法文老師。同佢用法式打左個招呼之後，佢就問下我學校、銀行、屋企等等既野，不過我詞彙實在太不足喇，成日好似雞同鴨講咁。傾到咁上下，佢老公，即係Patrick喺我身後出現了。一個肥肥地好典型既歐洲人，笑果陣鬼鬼馬馬，唔笑果陣個樣幾Cool咁，但應該都係好人黎。之後Myriam比左個咖啡機同熱水壺我擺喺房，以後就可以喺房沖野飲喇Yeah!!!我又送左Ｄ中國茶比佢，之後佢帶左我去裝茶、咖啡既櫃叫我自己拎黎沖，即係話，我可以沖返自己拎比佢地既茶，嘩哈哈～！ Myriam仲驚訝地發現，我同Patrick 同一日生日！睇黎生日果日都會好熱鬧。。。

今日食魚。原來所謂既食魚係真係得魚、飯（加左牛油既飯。。。）、麵包同芝士。想搵多樣送都冇－＿－。說好的蔬菜呢？點解冇人食菜既咩事呀？！！法國人唔係好識食架咩？不過條焗唔知咩魚雖然咩都冇比又幾鮮味既。照咁睇我都要買多Ｄ菜比自己食喇~_~今日聽到有個美國留學生話佢個host日日都有vegetables、meat同dessert，真係好羨慕呀嗚嗚～！！希望有奇跡啦。甜品唔使架喇，菜呀我要，嗚嗚～！

食飯既時候佢地唔知係咪因為好耐冇見好多野傾，但我唔係幾明。中途Patrick同Myriam都有問我關於法文同學校既野，希望遲Ｄ聽得明多Ｄ加入佢地既對話啦！

Ｐ.Ｓ.間屋終於有返Ｄ生氣。