8/9 法國的行政工作在搞什麼?

...今日成日心情都幾惡劣，因為搞居留證又出現事故。話說上堂上到十點放小息，咁我就諗住快快手去搵負責亞洲學生事務既楊先生比Ｄ文件佢，點知佢竟然話唔再搞呢樣野叫我落去直接搵另一個人。一落去就知出事了，有四五個學生排緊隊。要知道喺法國，每處理一個人既事務係可以花上二十分鐘的（但都唔代表成功：］）排排下隊有個韓國人同前面個中國人講，白色底既相好似唔得喎。大驚，我都係白色底喎！等住個半鐘左右終於入到去喇，點知佢話Patrick張證件copy太朦（我都估到架喇－＿－，法國人自己做野好求其，但對文件上既要求又執到正），同埋張相要藍色或者灰色底，叫我聽日再黎。。。

 即係搞左兩個鐘得個桔。

諗左好耐係咪應該影過Ｄ相，但又覺得好唔值得，更何況本身政府果張紙又冇寫一定要藍色／灰色，淨係寫淺色，又冇話一定要透過學校搞，淨係要寄去。於是決定自己影印完個Passeport就直接寄信算，再排隊真係浪費我既青春。

本身諗住同中大朋友一齊去Part-Dieu購一下物，但因為今晚Myriam同Patrick唔喺度食，要早啲仆返去問佢地拎護照，於是唯有孤身返屋企。好順利咁比我拎到護照，一點鐘終於搵到間影印鋪，佢話一點半先開，而家食飯。。。於是又返返屋企煮蕃茄醬腸仔生菜意粉食。。。食完再落去用左一毫影印，然後去郵局用左2.3買大信封寄信，終於暫告一段落。

返到屋企又要處理張電話卡充唔到值既問題，如果生活喺法國，我既人生應該有三分一都係處理呢啲瑣事-_-。MSN了一會，出左去平超市掃貨～！

平超市叫Lidl(讀音係呢dou，近似呢度)，不過今日唔係去呢間分店

琴日去Vieux Lyon既相-_-

挺有味道的

喺超市買既布甸，0.7歐有六個，港幣個幾一個，超平又超好食：）

買了香軟麵包同吞拿魚，仲有煙肉（喺雪櫃），ＣＥＲＥＡＬ係Myriam買的~~

買左幾樣野食都係3.88，抵到爛：）好開心咁行返屋企。

今晚得我同Mickeal喺度。Mickeal煮緊野食既時候，我入廚房同佢傾下計，問佢平時鍾意做咩。佢話鍾意玩電腦、同朋友聚下同埋踩單車。雖然都好嚴重既Deadair，但已經比之前好。然後佢忽然話好眼訓，今晚佢唔食野即刻訓覺，於是佢整既蕃茄雞蛋芝士螺絲粉我食左大半。哈哈哈，我覺得佢對火候既掌握好過Myriam一倍，我仲同佢講，你煮送幾好食喎。

其實聽日法國文化果科考試，但而家成十點乜都未溫，算了吧：）呵

合照仲未影到，唯有偷影佢地既家庭照同大家分享下先～～

最上面果個應該係Mickeal，果陣好細個好可愛呀！！但其他仔女既名我都唔記得，果然唔識串係好快忘記。

左三應該係Myriam，前面就係Patrick！不過呢張相應該都起碼十年前。

呢張相都應該係十年前，各人都應該老左唔少。左一左二係Myriam同Patrick，最右邊係Mickeal，果陣瘦瘦地幾靚仔～！！